Perfil [1]: Ema Baibain

Husi Emar baibain,
Toos no kafe nain,
Rai-husar nia oan,
Husi susar ba roman,
Ukun-an, mak ita roman
Iha ukun-an, ukun ita nian.

Hori uluk Timor-oan ukun-nain,
Ro-talin tasi-balu kesi ita-rain
Kuda-talin namkore,
kuda-nain baku-ain.

Foho, fatuk no uma lulik hahoris aswain,
Timor-oan kaer hikas kuda-talin,
Timor-Lorosa’e ukun-rasik-an.

Tempo too ona,
aban bain rua hahú ohin no iha ita nia kabas
hosi ema baibain ba knaar estadu nian iha Ramelau nia roman. 

(Samala-Rua)

Iha Sesta, loron 15 fulan Juinu tinan 1962, iha Suku Poetete, Postu Administrativu Ermera, Munisipiu Ermera, moris kosok oan mane ida, husi aman Pascoal das Neves no inan Maria Carlota Santa Florindo. Pascoal das Neves ho Maria Carlota Santa Florindo fo naran Jose António de Jesus das Neves ba kosok oan daruak nebe foin moris ne’e. Ikus mai Jose António de Jesus das Neves, nebe atinje ona otas mane klosan, kuinesidu ho naran Samala-Rua, iha periodu rezistensia.

Samala-Rua kaben ho Maria Agnes Bere no hetan oan mane ida naran Godofredo alias Doben ho tinan 1. Samala-Rua kaben tinan 51, tanba ninia tempu juventude dedika liu ba estudus no luta ba Timor-Leste nia ukun-rasik-an. Samala-Rua bei-oan husi dalas uma lisan Rae-Pusa, husi familia simples, klase baixa, nebe baibain ema dehan povu nia oan ka Maubere nia oan. Nia aman, Pascoal das Neves, nudar Karpinteiru no Tenente Segunda Linha iha Tempu Portugues no Maria Carlota Santa Florindo nudar dona da casa ka baibain kaer knaar uma-kain nian.

Samala-Rua moris husi familia to’os na’in, nebe fila-liman ho kafe, buka moris ho kafe folin no familia nebe laran di’ak no amigavel. Nudar oan husi familia to’os na’in, hala’o mos moris tuir siklu serbisu to’os-na’in kafe no batar nian, no hetan biban ba aprende husi abilidade no kapasidade nebe aman-inan sira iha.