Perfil [2]: Konflitu Politiku interrompe Estudu

Konflitu iha rai Timor (Foto: AMRT/Mario Carrascalao/FMS)

Samala-Rua hahu tama eskola pre-primaria iha Misaun Katolika Ermera tinan 1969 no remata 4ª klase iha tinan 1975. Ba Dili iha fulan Agostu 1975, ho objetivu atu kontinua eskola. To’o iha Dili, mosu situasaun politika nebe manas tebes entre partidu politika Timor oan sira, halo ninia vontade ho espetativa ba kontinua eskola laiha serteza. Iha tempu neba Timor monu daudaun ba konflitu politiku nebe halo partidu União Democrática Timorense (UDT) ho Frente Revolucionária do Timor-Leste Independente (FRETILIN) involve iha “golpe” no “kontra-golpe”. Guerra sivil ka funu malu entre maun-alin husi partidu 2 ne’e halo ambiente politika hahu rungu-ranga husi Dili.

Iha “golpe” ho “kontra-golpe” ne’e, kilat tarutu iha fatin barak iha Dili laran, ema halai namkari, Samala-Rua nebe iha tempu neba ho tinan 13, hamutuk ho familia sira nebe hela iha Vila-Verde mos halai ba helik-an iha uma mutin boot ida naran “Assistensia Social” iha Kaikoli, agora kampus UNTL funsiona ba. To’o tiha neba sira hateke ba Vila Verde ahi mos han ona uma sira. Edifisiu Assistensia Social sai fatin konsentrasaun.

Samala-Rua hahu haree no sente terus husi funu nian husi neba. Ema barak mak halai ba proteje-an iha neba, maibe fatin lato’o, hahan laiha, ema hamalaha no barak hetan moras. Iha neba mak Samala-Rua haree rasik ho matan oinsa ema kanek no mate tan tiru malu, iha konflitu armadu ida. Iha susar ho terus oioin nia leet ne’e mak mosu Samala-Rua nia tiun balu, nebe nudar militar armadu, konsegue arranja fatin nebe diak uituan iha “caserna militar” (ikus mai Obrigadu Baraack) hodi muda ba hamahon-an provizoriu. La kle’ur situasaun hahu hakmatek, ema ida-idak fila ba fatin hirak nebe seguru ka sira nia hela fatin, ba sira nebe uma sei tomak ka la hetan estragus. Samala-Rua ho nia familia sira mos fila fali ba Vila-Verde, iha apa-kiik Firmino Neves nia uma. Maibe iha uma ne’e nia varanda, hetan morteiru 120 ida nia musan nebe fura kalen varanda nian, harahun simentu varanda no haksoit ba tula hela iha kadeira rotan ida nia leten, la nakfera. Karik nakfera uma ne’e kala rahun hotu.

Tanba situasaun politika nebe manas tebes no laiha biban ba eskola ona, Samala-Rua hela iha Dili to’o fulan Outubru 1975, depois fila hikas ba Ermera. Espetativa aas ba eskola sai lakon nudar konsekuensia husi funu. Nia fila ba Ermera, hamutuk ho forsa armadas FALINTIL sira, sae kareta Moniz da Maia, kamioneta kinur roda 10.

Samala-Rua hela iha Ermera to’o forsa militar Indonezia sira tama vila Ermera iha fulan Marsu 1976. Ho prezensa militar Indonezia sira nian, obriga populasaun lubuk ba konsentra iha Vila laran. Situasaun hanesan mos “golpe” no “kontra-golpe” iha Dili, iha fulan Agostu 1975. Fatin limitadu iha vila laran, ema barak, hahan laiha, hamalaha, moras, kilat tarutu, haree no rona ema mate bebeik. Samala-Rua hela iha aredores Ermera-Vila to’o 1980, foin fila fali ba uma fatin rasik iha Poelala, mais ou menus 10 km husi Vila.