Perfil [15]: Husi KAK, Kandidatu ba Prezidenti Republika 2017-2022

Preokupa ho situasaun sosial no politika nebe evolui iha Timor-Leste no motivadu ho interese ba kompete iha eleisaun prezidensial 2017, Samala-Rua deklara rezignasaun husi Komisaun Anti-Korrupsaun. Deklarasaun ne’e nia hahu hato’o verbalmente ba Komisariu, Komisariu Adjuntu no funsionariu sira hotu iha 22 Dezembru 2015. Hodi lori la’o nia hanoin ne’e ho seriu ba oin mak iha loron 1 fulan Juinu Samala-Rua hatama karta rezignasaun ba Komisariu KAK no aprovadu iha 29 Junu 2016, hodi ba kompete iha eleisaun prezidensial 2017. 

Rezignadu tiha husi Komisariu Adjuntu KAK, Samala-Rua disponibiliza nafatin nia tempu ba KAK wainhira presiza. Mezmu KAK nudar orgaun Estadu nian nebe iha kompetensia espesializadu ba kontra korrupsaun, maibe responsabilidade ba luta hasoru korrupsaun responsabilidade sidadaun hotu-hotu nian iha funsaun saida deit. Kombate korrupsaun tenki sai nudar modelu patriotizmu foun iha Estadu Independenti ida ne’e.

Samala-Rua la’os de’it mai husi familia ida simples maibe nia iha iha forsa vontadu atu hasoru situasaun hirak nebe iha desafius barak. Dalan no knaar Prezidente da Republika todan no hasoru desafius barak. Maibe Samala-Rua hatudu nia vontade hodi ba kompete iha kargu ida ne’e. Hanesan ninia Companheiro Carlos Saky deskreve iha ninia livro “RENETIL iha Luta Libertasaun Timor-Lorosa’e, Antes Sem Título, Do Que Sem Pátria” nebe publika iha 2013:

“Samala-Rua, fizikamente haree hanesan ema isin fraku, maibe iha forsa interior ida boot tebes, dixiplina, simples, umilde, responsavel, pasiente, no serbisu maka’as. Dala ruma, nia la’o loron, la’o kalan, hodi organiza, no kordena serbisu iha sidadi sira nebe UNER sira iha ba”.

Deskrisaun Saky nian iha leten hatudu karakter Samala-Rua nian nebe, desde uluk kedas, hatudu kompromisu servisu nebe as maski iha situasaun difisik nia laran. Nia esperiensia servisu iha KAK bele orienta mos esforsu kombate korrupsaun ho abuzu de poder nebe ohin loron nakonu iha Timor-Leste no tulun habelar justisa ba Timor oan hotu-hotu.

Samala-Rua iha kunesimentu no bele koalia no hakerek ho dalen portugues, ingles no Indonesia. Ho esperiensia servisu nebe nia liu ona iha tempu rezistensia, iha periode tranzisaun 1999 too 2002 no durante periode independensia iha agensia internasional sira no iha setor publiku hanesan iha Sekretaria Estadu Juventude no Desportu liu-liu iha Komisaun Anti-Korrupsaun, fo bagazein lobuk ida ba nia atu kompete ba kargu Prezidenti Republika.

“Ita nia moris baibain no esperiensia servisu forma no eduka ita. Liu husi reflesaun bebeik, ita foti lisaun barak husi esperiensia hirak ne’e. Hau sempre lao ho lema nebe dehan ‘trabalhando aprendendo, aprender para trabalhar ou servir melhor’. Ida ne’e forma ita nia karakter pesoal no ita nia kapasidade lideransa. Nudar jerasaun kontinuadora ba lideransa Estadu nian, ita tenki prepara-an, hatudu korajein no prontidaun hodi asegura katak Timor-Leste lao ba futuru nebe sei diak liu tan. Idade Estadu nian naruk liu ema ida-idak nia idade. Ne’e duni fo kontinuidade lideransa Estadu nian husi jerasaun ba jerasaun nudar responsabilidade moral no politika lider Estadu nian hotu. Jerasaun foun presiza hatudu aten barani no prontidaun ba simu no hatutan responsabilidade ne’e”(Samala-Rua).

Nia kapasidade, esperiensia, konesimentu ho kualidade sira nebe iha, no ho apoiu husi nai-ulun sira no ema hotu-hotu nebe hakarak Timor-Leste nia moris diak, bele kontribui buat ruma ba Republica Democrática de Timor-Leste.