Perfil [5]: Haklaken Situasaun Timor-Leste iha Komunidade Foun

Malang la hamos no hakotu Seminarista sira ka Frater na’in 24 nebe iha tempu neba hala’o estudu iha Seminariu Maior Diosezanu Malang, nia relasaun emosional no konesimentu kona-ba situasaun no aspirasaun Povu Timor-Leste nian. Dala ruma sira halo diskusaun limitadu ho kolegas Frater indoneziu sira no uza mos forum reflesaun grupu hodi fahe esperiensia kona-ba situasaun iha Timor-Leste ba Frater no Padre indoneziu sira. Ikus mai sira komesa emprega lia-fuan balu hanesan “Fretilin”, “orang hutan”, “Timor-Leste”, “merdeka sendiri” ba Frater Timor-oan sira, nebe balu ho simpatia seluk ho siniku. Metodu komunikasaun ne’e konsegue dada duni simpatia husi Frater no Amu-Lulik indonezia balu ba kazu Timor-Leste no involve iha atividade sira pro-independensia to’o ajuda organiza apoiu no solidariedade ba Timor-oan sira nebe kapturadu, detidu no organiza Timor-oan sira ba tuir referendum no lori sira fila mai Timor-Leste hafoin anunsiu rezultadu referendum.

Samala-Rua sai koordenador ba Frater Dioseze Dili nian nebe estuda iha Malang durante tinan 2 husi Juilu 1987 to’o Juinu 1989 nebe organiza enkontru regular interna iha Seminariu, koordena atividade ho estudante Timor-oan sira iha Malang, hato’o relatoriu anual atividade Frater sira nian ba Amu Bispu inklui gastu orsamentu nebe Dioseze aloka ba sosa bisikleta no makina hakerek ba frater sira.