Perfil [9]: Asaun iha Jakarta no Tasi-Balu

Foto ilustrasaun Jakarta (nnoart.com)

Maski foin sai husi kadeia, Samala-Rua la deziste husi luta ba libertasaun Timor husi Indonezia nia liman kukun laran. Dala ruma, nia desloka husi Malang ba Jakarta hodi halo parte iha ekipa RENETIL nian nebe ba halo hela servisu rezistensia nian iha Jakarta. 

Iha Jakarta, Samala-Rua hola parte ativu iha organizasaun asaun manifestasaun 12 Junu 1998 iha Ministeriu Negosius Estranjeirus Indonezia nian nebe involve estudante Timor oan sira kuaze rihun tolu, no asaun lubuk ida tuir fali. Iha fulan Agostu 1998, Samala-Rua hamutuk ho ninia companheiros da luta sira Lucas “Rama Metan” da Costa, Joaquim “Russuo” Fonseca no Demétrio “Saka’onar” Amaral, halo vizita ida ba Finlandia, organizadu no ho apoiu finanseiru husi Komite 100 Finlandia hodi hato’o asuntu lubuk ida relasiona auto-determinasaun, meiu ambiente, ekonomiku, politiku no edukasaun ba Governo, membrus Parlamentu no sosiedade sivil Finlandia nian. 

Husi Helsinki-Finlandia, sira liu ba Portugal hodi partisipa iha Jornadas de Timor-Leste iha Lisboa nebe professor Barbedo Magalhães hamutuk ho membros RENETIL iha DIGAREX (Direcção Geral Autonoma da RENETIL no Exterior) organiza. Delegasaun RENETIL nian ne’e fila hikas mai Indonezia iha Setembru 1998 hafoin semana hira tuir konferensia no halo lobby politika iha rai-li’ur.