Perfil [11]: Fila mai Timor Leste

Foto ilustrasaun Timor Leste (nnoart.com)

Hafoin atividades lobuk ida iha Jakarta, vizitas ba Finlandia no Portugal iha 1998, Samala-Rua fila mai Timor-Leste, iha Dezembru tinan hanesan. Iha Timor-Leste nia servisu hamutuk ho kompaneiru Antonio da Conceição “Kalohan” iha Timor Aid nebe foin mak hahu loke iha Timor-Leste. Samala-Rua mos envolve ativu iha atividades CNRT nian hamutuk ho maun David Xemenes “Mandati”, Sr. Bensislau (matebian), Sr. Jose Reis, Sr. Leandro Isaac no seluk, molok tama ba referendum. 

Timor Aid nudar NGO foun nebe foin mak loke iha situasaun difisil nia laran, fo atensaun barak liu ba komunidade sira nia nesesidade liu-liu sira nebe desloka sai husi sira nia hela fatin tan ba kestaun seguransa no fo mos tulun ba maluk sira iha Frente Armada. Samala-Rua nia envolvimentu ativu iha servisu umanitariu no atividade CNRT nian hamutuk ho kompaneiru sira seluk, lori konsekuensia hetan atakes husi milisia sira iha fulan Junu, Likisa-Vila no iha Vila-Verde fulan Agostu 1999.

Iha situasaun ameasas nia laran nia konsegue jere transmisaun radiu FM ho frekuensia 95.4 Khz nebe oferese husi belun Amerikanu ida naran Willeam hodi halo transmisaun movel materia kampaina pro-independensia iha Dili. Iha biban hanesan Samala-Rua mos ajuda organiza estabelesimentu Presidium Juventude Loriku Aswain nebe hamahon organizasaun juventude klandestina lubuk ida molok realiza referendum.

Salama-Rua sai Team leader Ekipa-11 CNRT nian nebe halo kampana pro-independensia iha distritu Oekusi-Ambenu, Bobonaru, Ermera no Likisa, semana rua molok referendum iha 30 Agostu 1999. Durante periodu kampana ne’e hasoru atake makas husi milisia sira iha Maliana nebe la fo biban ba ekipa hodi halo kamapna iha Maliana Vila. Ekipa ne’e refujia tiha ba foho, lao liu husi Kailaku, Marobo no too iha Bobonaru, lori loron rua. 

Molok hahu referendun, nia hamutuk ho ekipa CNRT nian tulun mos kolokasaun obserbadores internasionais nebe mai husi tasi balu hodi observa referendum iha Timor-Leste no halo koordenasaun ho responsaveis UNAMET nian kona ba preparasaun ba referendum. Durante loron referendum Samala-Rua, sai Polling Staff voluntariu ba UNAMET iha Suku Poetete, Ermera.