Perfil [8]: Samala-Rua Kapturadu

Prizaun Lowokwaru - Malang, Marsu 1996

Samala-Rua halo serbisu iha RENETIL ho di’ak, infelizmente nia mos kapturadu iha biban nebe nia halo hela preparasaun hodi ba tuir Konferensia dahuluk APCET (Asia-Pacific Conference for East Timor) iha Filipinas. Funumaluk kaer Samala-Rua iha loron 19 fulan Maiu 1994, hafoin fila husi Timor-Leste iha dia 11 Maiu no depois tinan 2 nia kaer kargu nudar Presidente da Comissão Permanente da RENETIL. Hafoin kaer tiha nia, funumaluk sira sulan nia iha sela detensaun Polisia territoriu Malang nian, depois muda ba sela detensaun Polisia iha Surabaya. Husi Surabaya lori fila fali ba detensaun iha Malang no ikus liu muda ba prizaun jeral Lowokwaru Malang.

Funumaluk Indonezia hatama Samala-Rua iha kadeia hanesan ninia antesesor La-Sama. Samala-Rua hetan akuzasaun no kondenasaun ho razaun ninia “involvimentu iha movimentu separatista iha Indonezia, buka atu hamonu Indonezia, no buka tulun husi grupu oioin husi rai-li’ur hodi fo tulun ba luta ukun-an ba Timor-Lorosa’e nian.” Nia akuzadu ho pena tinan 5, maibe iha sentensa final hetan pena tinan 4. Samala-Rua kumpri prizaun durante tinan 3 fulan 4, iha prizaun Lowokwaru Malang, Indonezia. Iha julgamentu, Samala-Rua prepara ninia defesa rasik, ho depoimentu nebe ho titulu “Dili Menggugat Jakarta” ka “Dili Prosesa Jakarta”. 

Alein de depoimentu defeza nebe prepara rasik husik Samala-Rua, iha mos Ekipa de Defeza ida husi advogadu sira husi Indonezia nian. Iha julgamentu Samala-Rua afirma katak, “tuir nasionalidade no konsiensia patriotika ha’u ema Timor-Lorosa’e, no tuir direitu internasional ha’u sidadaun portugues.” Ho baze politiku no juridiku sira ne’e, Samala-Rua la simu Tribunal Indonezia nian hodi halu julgamentu ba nia. Nia mos lakohi lori ninia problema ba instansia Tribunal nebe aas liu, tanba nia la rekuinese kualker Tribunal Indonezia nian. Julgamentu ne’e, ba Samala Rua, la iha ninia legalidade, no lejitimidade. Hasoru situasaun hirak ne’e Samala-Rua dehan, “atu manan liberdade tenki lakon lai liberdade, atu manan independensia tenki sofre opressaun konsiensia”.

Iha julgamentu, Samala Rua halu apelu ba komunidade internasional hodi halu presaun ba rejimi Jakarta hodi liberta hotu dadur politika timoroan sira iha kadeia sira Indonezia nian, atu iha Indonezia ka iha Timor-Leste, no presiona rejimi Jakarta nian hodi serbisu hamutuk ho ONU, Portugal, no timoroan sira, hodi determina estatutu politika rai Timor-Leste nian tuir direitu internasional.

Esforsu Samala Rua nian sadik Indonezia hodi respeita direitu internasional, hetan influensia mos ba advogadu Indonezia sira nebe defende nia iha Tribunal. “Instituto de Assistência Legal” (LBH) nebe haruka advogadu Luhut Pangaribuan, hanesan Advogadu Defeza nian, sadik legalidade aneksasaun Timor-Lorosa’e husi Indonezia. Luhut hateten iha Tribunal katak, CNRM ho ninia komponente tomak, inklui RENETIL, hetan rekuinesimentu legal tuir direitu internasional. Governu Indonezia mos rekuinese sira nia ezistensia tuir akordu tripartidu ho Portugal iha ONU nia mahon. Nia hateten, hada’u rai Timor-Lorosa’e ho forsa militar hanesan buat ida ilegal tuir direitu internasional, no ONU sei preokupa tebes ho rai ne’e tanba, nia sei iha direitu ba autodeterminasaun.

Funu halo Samala-Rua ho Sabalae nia destinu sai todan. Funumaluk kaer Samala Rua iha 1994 soe tama ba kadeia laran no Sabalae funumaluk kaer iha 1996 no lori lakon to’o ohin loron. Samala-Rua sai husi kadeia iha loron 23 Setembru 1997.