Perfil [12]: Involvimentu iha Pre no Post Restaurasaun Independensia

Jose Neves Samala-Rua - Involvimentu iha pre no post restaurasaun independensia


Iha 2001 too 2002, sai koordenador programa RENETIL nian ba edukasaun sivika, monitorizasaun kampaina partidu politiku no eleisaun Assembleia Constituinte no Assembly Watch, iha periodu nebe Miguel Manetelu, atual Vise-Ministru Solidariedade Sosial, nudar Sekretariu-Jeral RENETIL nian. Ikus mai, Samala-Rua eleitu ba Sekretariu-Jeral RENETIL nian hodi substitui ninia companheiro Miguel Manetelu. Samala-Rua lidera RENETIL durante periode rua tuir malu husi 2004 to’o 2008 no 2008 to’o 2012, maibe la konsegue remata segundu periodu tuir termus mandatu tanba resigna-an iha Abril 2010 hodi asume kargu nudar Komisariu Adjuntu iha Komisaun Anti-Korrupsaun (KAK) to’o Junu 2016.

Durante asume kargu nudar Sekretariu Jeral RENETIL, Samala-Rua reativa fila fali Buletin Neon Metin no Radiu Loriku Lian nebe paradu tiha, organiza programa Parliament Watch no programa prevensaun no rezolusaun konflitu, nebe hetan apoiu husi USAID, UNDP, Apheda, the Asia Foundation, Governu no Sociedade Civil Finlandia nian.

Husi Juilu 2004 too Juilu 2007 sai jestor ba projetu naran Leadership Capacity Building for Economic Development (LED - ho fundu husi Post Conflict Funding) husi Banku Mundial ba Ministeriu Edukasaun, Kultura, Juventude no Desportu alokadu espesifiku ba Diresasun Juventude no Desportu hodi dezenvolve kapasidade lideransa juven sira. Projetu apoia estabelesimentu no reforsa Konsellu Juventude iha Distritu sira no inisitivas husi grupu foinsa’e sira. Projetu ne’e halo mos formasaun sidadania sivika ba joven sira. Durante jere projetu ne’e, Samala-Rua halo koordenasaun no kooperasaun ho UNICEF hodi realiza survey nasional kona-ba juventude iha 2005 hodi dezenvolve politika nasional juventude, hahu halo diskusaun ho UNICEF kona ba posibilidade harii Parlamentu Juventude Timor-Leste nian, nebe ikus mai forma Parlamentu Foinsa’e nebe funsiona to’o agora.

Remata tiha projetu ne’e, Samala-Rua asume funsaun nudar asesor ba Sekretariu Estadu Juventude no Desportu Miguel Manetelu husi Outubru 2007 to’o Marsu 2010. Nudar asesor Samala-Rua integra atividades projetu nian sira hanesan politika juventude, Publikasaun Mensal Lian Foinsa’e ba iha programa Sekretaria Estadu Juventude no Desportu (SEJD). Rezultadu serbisu seluk nebe hetan durante Samala-Rua hala’o funsaun ne’e mak finaliza politika juventude nebe hahu elabora wanhira nia sei jere Projetu LED, nebe aprovadu iha Konsellu Ministrus iha Novembru 2007, ajuda elabora organika SEJD no Lei Baze Desportu nian, kontribui ba harii Parlamentu Foinsa’e no estabelese programa interkambiu juventude iha SEJD.

Sai national consultant ba UNDP iha fulan Janeiru to’o Marsu 2001 hodi dezenvolve dokumentu projetu edukasaun sivika UNDP nian molok realiza eleisaun assembleia constituinte. Husi Outubru too Novembro 2003 nudar national consultant ba avaliasaun UNDP nia projetu infraestrutura subsistensia nebe halo iha 2000 to’o 2003. Dezembro 2003 to’o Abril 2004 sai national consultant ba JICA nia projeto peskiza empregu iha Timor-Leste. Seluk husi serivisu hirak ne’e Samala-Rua mos sai membru Board ka Konsellu Administrasaun ba Fundasaun Haburas, Asosiasaun HAK no Justice System Monitoring Program (JSMP).
Perfil [12]: Involvimentu iha Pre no Post Restaurasaun Independensia Perfil [12]: Involvimentu iha Pre no Post Restaurasaun Independensia Reviewed by José Neves Samala-Rua on 5:38 AM Rating: 5

No comments